Ardit Kërtusha ka dhënë detaje të tjera në lidhje me tërheqjen e tij nga gara për kryetarin e Partisë Socialiste në Durrës.
I ftuar në rubrikën “Opinion” në News24, Kërtusha u shpreh se listat për kandidatë ishin false, me anë të të cilave ishte përcaktuar fituesi. Ai shton se kandidati i tjetër i kishte listat e plota, ndërsa atij vetë i janë mohuar.
Ai fajëson në lidhje me këtë ish-kryebashkiakun e Durrësit, Vangjush Dakon, teksa thotë se ishte ai që e plotësoi këtë listë në muajin e fundit të qeverisjes së tij.
Ai vazhdon më tej duke u shprehur se Dako vijon të mbetet drejtuesi i Durrësit, ndërsa shton se këto ‘goditje’ ndaj tij erdhën sepse nuk pranoi të ishte një ‘marionetë’ e ish-kryebashkiaakut.
Intervista:
Kush e krijoi Asamblenë marionetë, siç e quani ju?
Ata që drejtojnë PS në Durrës, me Vangjush Dakon dhe kandidatin, që nuk ka asnjë lloj vendimmarrje. E vetmja vendimmarrje e tij është përfitimi. Unë isha një kandidat, që nuk u informove as për datën, as për komisionin, apo nëse do të kisha një përfaqësues në komision. Unë lobova për një garë ‘një anëtar, një votë’.
Dako e mori në mënyrë jolegjitime mandatin dhe ashtu e zhvilloi dhe punën. Në muajin e fundit që kishte zgjedhje ai plotësoi një listë, ku emrat as vetë nuk e kishin idenë që janë anëtarë të kësaj liste. Mendova që do ishte i pavend vazhdimi i kandidimit tim.
Vangjush Dako dhe familja e tij janë shpallur “non grata’ nga SHBA, si e vlerësoni figurën e tij?
S’kam një vlerësim konkret për të. Deri më sot ai është drejtues i Durrësit. Dihet që çdo gjë e ka një cikël, një fillim dhe një fund. Unë nuk kam pasur debat me Dakon, por unë u godita, pasi më shkarkuan nga puna. Goditja ishte në mënyrë të vazhdueshme, që të mos bëja karrierë, pasi nuk pranova të isha një marionetë e tij. Që prej kandidimit, ka pasur presione ndaj meje.
A keni qenë pranë njerëzve të goditur nga tërmeti?
Unë kam qenë vetë i prekur nga tërmeti. Pallati im ka qenë ndër më të goditur nga tërmeti. Me aq sa kemi pasur mundësi, kemi qenë në kontakt me të gjithë qytetarët e prekur.
Dako është parë nga dita e 5 apo 6?
Njerëzit shprehin shumë pakënaqësi, pasi ai ishte një rast fatkeqësie. E rëndësishme është që njerëzve t’iu ofrohet shërbimi. Dako nuk ka asnjë funksion, ka thjesht funksion partiak.
Jeni i përgatitur për reagime nga Dako?
Patjetër. I kam të gjitha kërkimet të rregullta. Kam shkuar te selia e PS mbi 5 herë dhe ka qenë e mbyllur. E dinë të gjithë qytetarët e Durrësit.
