Ministria e Mbrojtjes në Rusi ka dalë me një deklaratë të bujshme ditën e sotme.
Ajo shprehet se ditën e djeshme një aeroplan që transportonte 172 pasagjerë u detyrua të bënte një ulje emergjente, në një bazë ruse në Siri për të mos u futur nën zjarrin e artilerisë siriane.
Zëdhënësi i ministrisë, Igor Konashenkov tha se sistemet siriane të mbrojtjes ajrore që përgjigjen ndaj sulmeve ajrore izraelite, mund të kenë synuar gabimisht sulmimin e avionit me civilë. Sipas CNN, aeroplani po përgatitej për të zbritur në aeroportin e Damaskut, kur u gjend në mes të sulmit.
Konashenkov nuk e emërtoi linjën ajrore por tha që një Airbus-320 që u ngrit nga Teherani i shpëtoi për pak “zonës vdekjeprurëse të zjarrit të artilerisë”, ndërsa përgatitej të zbriste, përpara se të shmangej në bazën ajrore Khmeimim të Rusisë, e cila është në juglindje të qytetit të Latakia.
Konashenkov tha që Izraeli kishte gjuajturtë enjten 8 raketa në Damask, por pa hyrë në hapësirën ajrore siriane. Ushtria Siriane përdori sisteme të mbrojtjes raketore për të zmbrapsur sulmet ajrore, tha ai.
Konashenkov akuzoi Izraelin se përdorte avionët e pasagjerëve si mburoja nga sistemet siriane të mbrojtjes ajrore. Forcat e Mbrojtjes së Izraelit dhe Ministria e Punëve të Jashtme izraelite nuk kanë komentuar pretendimet ruse, as sulmet që i janë atribuar Izraelit.
Izraeli ka kryer qindra sulme në Siri, kryesisht duke synuar transferimin e teknologjisë së raketave të drejtuar me precizitet nga grupe të mbështetur nga Irani, të cilat po luftojnë për të mbështetur regjimin e Presidentit Bashar al-Asad.
Rusia është aleati më i fuqishëm ndërkombëtar i Asadit, duke i siguruar fuqi ajrore dhe mbështetje tjetër ushtarake. Incidenti vjen rreth një muaj pasi Irani qëlloi pa dashje një aeroplan ukrainas, duke vrarë 176 njerëz.
