Pak ditë më parë u dha lajmi i hidhur se kishte ndërruar jetë notari i njohur, Klavio Meca. 24-vjeçari humbi jetën si pasojë e një arresti kardiak në SHBA, aty ku ishte diplomuar dhe jetonte prej vitesh.
Meca kishte arritur suksese të shumta në sportin e notit, duke veçuar atë në Budapest të Hungarisë ku kishte thyer rekordin kombëtar në 400 metra stil të lirë me kohën e përgjithshme 4’04”03. Ai gjithashtu ishte i njohur për sjelljen e tij shembullore dhe disiplinën sportive.
Tezja dhe daja i të ndjerit ishin të ftuar në emisionin “Shqipëria Live” në Top Channel. Daja Besard Vrapi u shpreh se telefonata e fundit me të ka qenë për Krishtlindje. Ai tha se Klavio ka studiuar në Shtetet e Bashkuara të Amerikës, e kishte pak kohë që kishte nisur edhe punë. Ai tha se 24 vjeçari nuk ka patur asnjë sëmundje.
“Por si pasojë e pandemisë, ishte në shtëpi. I festoi edhe Krishtlindjet dhe pastaj iku. Ishte gjithmonë pozitiv. Nuk ishe nipi, por shoku im. Nuk ka patur ndonjë gjë, sëmundje”, tha daja.
Ai rrëfeu më tej se motra e 24-vjeçarit merret po me not, dhe ka bërë një premtim tani që Klavio nuk jeton më.
Motra e të ndjerit ka premtuar se “për shpirtin e vëllait të saj, do të bëhet kampione bote”.
