Kreu i shtetit, Ilir Meta, ka reaguar për herë të parë pas shkarkimit, ku e ka cilësuar si shfaqje e parlamentit monist për të spostuar vëmendjen. Dy ditë pasi Kuvendi votoi raportin e Komisionit Hetimor për ta shkarkuar nga detyra, Meta e ka konsideruar vendimin si një veprim të mazhorancës për të larguar vëmendjen nga krimet zgjedhore. Presidenti Meta ka ironizuar vendimin e Kuvendit për ta shkarkuar atë, duke thënë se është i ‘gatshëm për takimin e 10 majit’, duke nënkuptuar se procedura e ndjekur nuk ishte sipas rregullores, pasi pretendimet e tiij nuk janë dëgjuar.
“Duhet të jemi të kënaqur që po kalojmë nga epoka e para 25 prillit e parlamentit monist, në një epokë të pluralizmit politik parlamentar, pavarësisht se zgjedhjet ende nuk kanë përfunduar dhe duhet të jemi të duruar deri sa të përfundojnë proceset e ankimimit.
Lidhur me shfaqjen më të fundit të parlamentit monist, ju e dini që jemi përpjekur të qëndrojmë larg, sepse ka qenë shfaqje për të hequr vëmendjen nga hetimi i krimeve zgjedhore dhe për të spostuar vëmendjen te fajtorët që nuk ekzistojnë.
Theksoj gatishmërinë time për të takuar iniciatorët e kësaj shfaqje brenda afatit ligjor që ishte data 10 maj, dhe për të cilën i lajmërova dhe ata e refuzuan sepse kërkonin që presidenti të spostonte agjendën”, tha Meta.
Presidenti foli edhe për blerje të disa deputetëve, që të votonin shkarkimin e tij. “Ka shumë arsye, ky Kuvend të votojnë në atë mënyrë se ju e dini që presidenti ndaloi në 8 qershor një gjakderdhje të programuar në prag të zgjedhjeve lokale. U ka plasur cipa fare, flasin hapur sa euro kanë marrë për të shkarkuar presidentin”.
