Kryeministri Edi Rama ka folur në lidhje me shpërblimet e pensionistëve që jepen në fund të çdo viti.
Në një prononcim për gazetarët, kreu i qeverisë u shpreh se vendimi nëse këto shpërblime do të ndahen edhe këtë vit, do të jepet ditën e nesërme. Ai pohoi se do shihet gjithçka duke u bazuar tek gjendja në të cilën ndodhet vendi.
Diskutimet në lidhje me shpërblimin e pensionistëve lindën pas gjendjes së jashtëzakonshme në të cilën ndodhet vendi, pas tërmetit të 26 nëntorit.
“Nesër kemi mbledhjen e qeverisë dhe do të flasim për këtë. Çka na ka ndodhur na ka bërë më të kujdesshëm do të thosha, jo të frenuar. Ideja ka qenë dhe mbetet që ne të mos cenojmë prioritetet dhe sigurisht që pensionistët nuk janë kurrë një kategori që mund ta harrojmë ose neglizhojmë. Por nga ana tjetër jemi të kujdesshëm që do ta përballojmë rindërtimin, qoftë edhe vet. Ndaj duhet të presim dhe rezultate e Konferencës së Donatorëve për fondet, në mënyrë që të kemi një qartësi se sa do të jetë barra jonë në barrën e përgjithshme. Do të komunikojmë në vijim. Është pyetje me vend dhe është një shqetësim që e kam të qartë dhe të fortë”, tha ai.
