‘Shqipëria ka bërë hapa mbrapa në rrugën e integrimit’. Kështu u shpreh kreu i PD-së, Lulzim Basha, në një prononcim për mediat jashtë selisë blu. Pas takimit të mbajtur me ambasadorët e vendeve të BE-së, Basha ia faturoi fajin kryeministrit Rama për krizën ekonomike dhe politike. Sipas tij, në Shqipëri kemi një qeveri të falimentuar, dhe se për shkak të keqqeverisjes vendi po kalon në krizë të thellë.
Basha zbuloi se ka kërkuar nga ambasadorët ndihmë, që Shqipëria të plotësojë kushtet e të afrohet sa më shumë me BE-në.
“Shqipëria po bën hapa mbrapa. Kriza po thellohet prej veprimeve të javëve të fundit. Po e largojnë Shqipërinë nga Evropa. Opozita mbetet e përkushtuar për ecjen e integrimit evropian dhe për plotësimin e kushteve.
Kam kërkuar ndihmën e vendeve anëtare që Shqipëria të plotësojë kushtet e integrimit, që të hapë negociatat, dhe të ketë mbështetje politike dhe ekonomike. E ka dhe më shumë të nevojshme.
Çështja e dytë ka qenë ekonomike. Pasi Rama kërkon që edhe në kohë pandemie, t’i çojë lekët diku tjetër. 7 në 10 familje shqiptarë janë në humnerë ekonomike. Nuk ka asnjë mbështetje simbolike. Në tërësi është një situatë shumë e vështirë, si tek baza ushqimore por dhe tek biznesi që po falimenton. Bizneset prodhuese janë në vështirësi.
Nga ana tjetër, me ardhjen e sezonit veror, sërish bizneset janë në vështirësi. Këto ishin dy shqetësimet e mia. Ne do të bëjmë gjithçka që të ecë integrimi dhe nga ana tjetër. Të kemi një plan me BE për të mbështetur familjet shqiptare, për shkak të krizës së rëndë ekonomike, punësimit që po kthehet edhe në plagë”, tha Basha.
Sa i takon protestave, kreu i PD-së konfirmoi se nesër do të jetë në krahë të artistëve.
