Gjykata i ka dhënë të drejtën mjekut Edvin Prifti t’u japë mësim studentëve. Pasuria e konfiskuar nga SPAK në drejtim të mjekut Edvin Prifit, ka kapur shifrën e 1 milion eurove dhe po hetohet për ‘korrupsion’ dhe ‘pastrim parash’. Mësohet se Apeli i Gjykatës Speciale kundër korrupsionit, i ka dhënë atij të drejtën për të ushtruar profesionin e mësimdhënies në universitetin publik të Mjekësisë.
Prifti i është pezulluar e drejta e ushtrimit të profesionit të mjekut, deri në përfundim të hetimeve, por duket se do të ushtrojë atë të mësimdhënies edhe pse është nën akuzë për ‘korrupsion’ dhe ‘pastrim parash’.
Gjykata e Posaçme sekuestron pasurinë e mjekut
Prokuroria e Posaçme Kundër Korrupsionit dhe Krimit të Organizuar, ka sekuestruar pasurinë e mjekut kardiolog, Edvin Prifti, i cili është aktualisht në hetim pasi emri i tij doli në dosjen kundër gjyqtares së Krujës, Enkelejda Hoxha. SPAK kundër Priftit ka ngritur 2 akuza ‘Korrupsioni pasiv i personave që ushtrojnë funksione publike’ dhe ‘Pastrimi i produkteve të veprës penale ose veprimtarisë kriminale’, si dhe gjykata ka vendosur një masë për pezullimin e tij nga puna.
Shefit të Kardiokirurgjisë iu gjetën 250 mijë euro dhe afro 160 milionë lekë të reja në shtëpi dhe në zyrë. Mjeku i njohur u arrestua pas zbardhjes së përgjimeve të sekretares së Gjykatës së Krujës, Manuela Mallkuçi, e cila u arrestua bashkë me gjyqtaren Enkelejda Hoxha dhe 10 persona të tjerë.
