Turqia ka dhënë sinjalet se është e gatshme për luftë me Francën dhe Greqinë. Presidenti turk Recep Tayyip Erdogan, nuk është kursyer aspak ndërsa ka thënë se janë të gatshëm të paguajnë gjithçka në këtë rrugë që kanë nisur.
“Shigjeta ka dalë nga harku, dhe do ta mbërrijë synimin. Në këtë rrugë që kemi nisur, jemi të gatshëm të paguajmë gjithçka”, ka thënë ai.
Erdogan riktheu në fokus marrëveshjet e shekullit të fundit, të cilat, i quajti pazare të padrejta.
“Ky qëndrim i vendit tonë, i hap rrugë prishjes së llogarive shekullore. Kjo është edhe arsyeja pse na sulmojnë. Se prishja e këtyre hesapeve, sjell dhimbje”.
Për këtë është i gatshëm edhe për përballje ushtarake. Erdogan ka thënë se nuk do të heqin dorë nga kjo përpjekje.
“Armiqve tanë iu themi ja tek është sheshi. Ashtu siç shpirti është i lidhur me trupin, edhe njerëzit dhe ushtarët janë të lidhur me këtë tokë, derisa të mbetet kufoma e fundit në këtë territor. Ne nuk heqim dorë nga kjo përpjekje. Për këtë arsye, nuk hezitojmë fare që të japim dëshmorë”.
Ai shtoi më tej se Turqia ndihet e kërcënuar në rajon, dhe për ato shtete drejtoi disa pyetje.
“A janë të gatshëm edhe ata që na dalin kundër në Mesdhe, që të bëjnë të njëjtën sakrificë? I pranon populli grek ato që do të vuajnë për shkak të drejtuesve të tyre të papërgjegjshëm? E di populli francez se çfarë do të paguajë për shkak të drejtuesve të tyre të papërgjegjshëm”? Ne dimë shumë mirë se ku kemi qenë. E di se çfarë qëndrimesh mbajmë sot, si dhe çfarë kemi si synim në të ardhmen”.
