Nga Anxhela Ferra
Për brezin e para viteve ’90-të marrja e bukës me vete në shkollë apo në punë është diçka jo e panjohur. Por, duket se me kalimin e viteve dhe me modernizmin e shoqërive, kjo gjë është kthyer në tabu. Për brezin e sotëm, brezin e fast-food-eve, kjo gjë është e dalë nga moda. Duke ia injektuar edhe prindërve, të cilët deri dje e merrnin bukën me vete.
Madje të shumtë janë atë që e kanë kompleks, e konsiderojnë edhe turp. Edhe pse ky i fundit është shumë herë më i shëndetshëm dhe i sigurt. Ndaj, edhe institucionet përkatëse, nutricionistë përherë e më tepër bëjnë thirrje veçanërisht prindërve, që të kthejnë vëmendjen në këtë traditë të vjetër.
Drejtoresha e politikave arsimore në Bashkinë Tiranë, Arjola Byzyka thotë për Tirana Today se nisma e Bashkisë “Ushqehu shëndetshëm! “Merr bukë me vete”!, synon të implementohet në më tepër shkolla këtë vit.
“Ka një urdhër që të mos tregtohet afër mjediseve të shkollave. Për këtë arsye shpesh herë dhe rregulloret e shkollave janë bërë strikte. Duke mos lejuar fëmijët që të dalin, jo vetëm nga ora e mësimit. Por, as në orën e pushimit në mënyrë që ata të largohen në komunikim me këta tregtarë ambulantë. Të cilët tregtojnë ushqime të pakontrolluara.
Ndërsa problemi tjetër, është se si ne do të edukojmë brezin tonë të ri. Se si do të edukojmë familjet tona, që tashmë ushqimi të merret nga shtëpia. Dhe jo të sigurohet nga vetë fëmijë, me përzgjedhjen e tij të rastësishme. Janë bërë fushata të tëra për ndërgjegjësimin e prindërve, që t’ia japin ushqimin me vete fëmijëve.
Ia kemi arritur në shkollat të cilat janë pjesë e projektit “Të bëjmë detyrat e shtëpisë”. Sot, fëmijët në këto shkolla të cilat e ndjekin këtë projekt e marrin ushqimin me vete. Prindërit janë të gjithë të informuar mbi vlerën dhe gjithë të mirat që siguron ushqimi i gatuar në shtëpi. Në krahasim me ushqimin të marr të gatshëm nëpër fast-food apo tregtarë të ndryshëm afër shkollave.
Shumica e prindërve nëpër shkollat afër Tiranës e mirëpresin si ide dhe e kërkojnë. Prandaj edhe këtë vit, ne i kemi propozuar zyrës arsimore dhe Ministrisë së Arsimit, hapjen e disa shkollave të tjera që të bëhen pjesë e nismës “Të bëjmë detyrat e shtëpisë”.”
Mos ushqyerja shëndetshëm është një problematikë që është shfaqur dukshëm edhe te fëmijët shqiptarë. Të cilët me shtimin e fast-food-eve dhe tregtarëve ambulantë, shtojnë edhe rrezikun për organizmin e tyre. Gjë e cila reflektohet edhe në sjelljen e fëmijëve.
“Nëse një fëmijë nuk ushqehet me një dietë të ekuilibruar, ai nuk ka një përqendrim në orën e mësimit. Ai nuk ka një rendiment në mësim-nxënie. Nëse një fëmijë i moshës 10-12 vjeç konsumon pije me gaz apo pije të ndaluara për moshën e tij; sigurisht që ai krijon një sjellje më agresive. Sepse vetë preparatet që gjenden në këto pije, shkaktojnë këto lloj ndikimesh në sistemin nervor të organizmit.
Pra, nga përvoja ime si mësuese, unë e kam vënë re këtë gjë te nxënësit. Ata nxënës që vinin nga familje, që kujdeseshin kishin një performancë shumë herë më të mirë në orën e mësimit. Dhe një sjellje shumë herë më korrekte me shokët, mësuesit e komunitetin që i rrethon. Ndërsa, fëmijët të cilët aty për aty i shihje me patetina, me pije me gaz në dorë ishin gjatë gjithë kohës të papërqendruar.”/ TIRANA TODAY
