Pas përfundimit të Botërorit, duket se shumë shqiptarë e kanë boshatisur Sheshin Skënderbej. Për t’ia lënë vendin turistëve, të cilët ditët e fundit po e vizitojnë më së shumti. Ata vijnë nga shtete të ndryshme, disa individualisht e të tjerë nëpërmjet tureve. Por, ndërsa vite më parë, Tirana ishte veç një qytet transit për të shkuar në Jug apo në Veri të vendit, gjërat kanë ndryshuar. Gjithnjë e më tepër turistët e preferojnë kryeqytetin dhe qëndrojnë për ditë me radhë.
“Po bëjmë një udhëtim në të gjithë botën. Ndaj, vitin tjetër do të shkojmë në Azi, Kinë, Indi etj. Këtu në Tiranë nuk jemi duke qëndruar as në hotel apo hostel. Përdorëm një aplikacion, ku qëndrojmë në shtëpitë e të tjerëve. Jemi prej 3 ditësh në Tiranë, dhe është kryeqytet shumë i bukur.”
“Është një aventurë të vish në Shqipëri. Sepse është një destinacion kryesor për turistët. Qytetet janë shumë interesante dhe moderne. Ndërsa, në Tiranë me sa po shoh, është duke punuar akoma. Por, jeni një vend i gjallë.”
Por, shumë prej tyre shprehen për Tirana Today se mbeturinat janë një problem me të cilën janë përballur në çdo qytetet. Ndërkohë një turist ngre problematikën e sinjalistikës së keqe rrugore.
“Është mirë, por mendoj se duhet të ndryshoni disa gjëra. Kur ecën në rrugë, shpesh bie erë e keqe. Dhe sinjalistika rrugore është në gjendje shumë të keqe. Kurse shqiptarët janë të sjellshëm, por nuk janë shumë të lumtur, nuk qeshin. Mendoj se një prej problemeve qëndron tek paratë.”
“Nuk më pëlqeu që në disa zona natyrale shumë të bukura, kishte mbeturina.”
“Jemi dukë bërë një udhëtim në të gjithë Evropën. Ndaj para disa ditësh shkuam në Sarandë. Atje kishte plazhe të bukura, por ajo që na pëlqeu më tepër, ishin çmimet e ulëta. Por, në Sarandë kishte mbeturina gjithandej.”
Ata shtojnë se veç faktit që Shqipëria nuk është një vend ende i pazbuluar nga shumë turistë, një tjetër arsye përse e vizitojnë, janë çmimet e ulëta, si edhe kultura e panjohur.
“Prisnim që Shqipëria të është e ngjashëm me Zvicrën, sa i takon maleve. Por, ka më shumë plazhe të bukura. Kjo pasi kemi lexuar shumë artikuj, ku flitej për ngjitjet në malet e bukura të Veriut.
Shumë njerëz më kanë folur për shqiptarët që janë shumë miqësor.
I admiroj shqiptarët. Një prej tyre është edhe toleranca fetare që keni. Mendoj se vendos një standard për gjithë botën. Çmimet janë shumë të arsyeshme. Ne sapo erdhëm nga Italia, ndaj këtu është shumë më lirë.” TIRANA TODAY
