Presidenti i Shteteve të Bashkuara, Donald Trump, ka shkarkuar drejtorin e Shërbimit Sekret, Randolph Alles.
Shërbimi Sekret është agjencia përgjegjëse për mbrojtjen e presidentit dhe të nënpresidentit të SHBA-së, të ish-presidentëve dhe të krerëve të shteteve që vizitojnë SHBA-në.
Largimi i Alles vjen një ditë pasi sekretarja Kirstjen Nielsen paraqiti dorëheqjen e saj, pas presionit mbi situatën në kufirin amerikano-meksikan.
Dhjetëra zyrtarë janë larguar nga administrata, qëkur Trump erdhi në pushtet në 2017.
Shtëpia e Bardhë konfirmoi largimin e Alles, por nuk dha detaje nëse presidenti Trump e shkarkoi atë.
Sekretarja për shtyp, Sarah Sanders tha në një deklaratë: “Randolph Alles ka bërë një punë shumë të mirë në agjenci këto dy vitet e fundit dhe presidenti i është mirënjohës për shërbimin e tij për shtetin prej më shumë se 40 vitesh”.
Alles e ka udhëhequr Shërbimin Sekret për dy vjet dhe ka shërbyer në Trupat Detare të SHBA-së për 35 vjet, përpara se të tërhiqej nga ushtria në vitin 2011./ Tirana Today
