Me rastin e 12 vjetorit të Pavarësisë, presidenti Amerikan i ka dërguar një letër urimi homologut të tij Hashim Thaçit.
Presidenti Trump është optimist dhe beson se ardhmja e Kosovës do të jetë e ndritur. Nga ana tjetër, ai i ka bërë thirrje Kosovës që të shfrytëzojnë maksimum momentin dhe të normalizojnë marrëdhëniet me Serbinë.
Mesazhi i tij i urimit, ku në qendër ka normalizimin e marrëdhënieve me Serbinë, vjen pas letrës urimit nga Mike Pompeo për Albin Kurtin, ku i kërkohej i njëjti angazhim.
LETRA E DONALD TRUMP PËR HASHIM THAÇIN
I nderuari President
Populli Amerikan dhe unë së bashku, urojmë të gjithë qytetarët e Kosovës për 12 vjetorin e pavarësisë së Kosovës. Lidhjet e fuqishme në mes të Kosovës dhe të Shteteve të Bashkuara janë farkëtuar nga përkushtimi i përbashkët për bërjen e Kosovës vend sovran, të pavarur, multi-etnik dhe demokratik. E përgëzojmë Kosovën për zgjedhjet demokratike në muajin tetor dhe mirëpresim angazhimin e vazhdueshëm për të çuar përpara paqen, drejtësinë dhe prosperitetin për popullin e Kosovës si dhe tërë rajonin e Ballkanit Perëndimor.
Ju dëshirojmë sukses në vitin që ka filluar në fokusimin tuaj në normalizim të marrëdhënieve me Serbinë, në forcimin e sundimit të ligjit si dhe në krijimin e kushteve për zhvillim sa më vibrant të sektorit privat. E ardhmja e vendit tuaj është e ndritshme. Shtetet e Bashkuara mbesin të përkushtuara për marrëdhëniet e fuqishme bilaterale, të mbështetura në punën e vyeshme të popullatës tuaj dinamike dhe në përcaktimin e përhershëm për vlerat tona të përbashkëta. Sinqerisht Donald J. Trump.
