Pasi u pa të dridhej për herë të tretë brenda një kohe shumë të shkurtër, kancelarja gjermane Merkel ka reaguar duke qetësuar të gjithë njerëzit.
“Nuk ka nevojë për t’u shqetësuar”, ka deklaruar Merkel në një konferencë shtypi me kryeministrin finlandez, Antti Rinne në Berlin. “Gruaja e Hekurt” tha se ishte në procesin e trajtimit të sëmundjes.
“Qartësisht që asgjë nuk ka përfunduar, por ka përparime”, deklaroi Merkel.
Kancelarja gjermane pësoi sërish dridhje të trupit, gjatë pritjes me nderime ushtarake të kryeministrit finlandez, Antti Rinne. Por ndryshe nga 2 herët e para, dridhjet nuk ishin dhe aq të forta.
Merkel u pa të dridhej për herë të parë në mes të qershorit, gjatë pritjes së presidentit ukrainas Volodimir Zelensky dhe vetëm disa ditë më vonë, pas emërimit të ministres së re të Drejtësisë, Christine Lambrecht nga ana e presidentit Frank-Walter Steinmeier në pallatin ”Bellevue” në Berlin.
