Janë identifikuar autorët e vrasjes së shqiptarit Astrit Lamaj, trupi i të cilit u gjet i murosur më 15 janar të 2019, gjatë restaurimit të një vile në komunën Senago, në provincën e Milanos.
Policia italiane, ka zbatuar mëngjesin e sotëm urdhër arrestimin e lëshuar nga prokuroria e Monzës, ndaj 4 shtetasve italianë, të akuzuar për vrasjen e shqiptarit.
Nga hetimet e policisë, bëhet me dije se 4 italianët e arrestuar janë ekzekutorët e vrasjes së shqiptarit, të përshfirë dhe më parë në botën e krimit. Sipas hetimeve policore, Astrit Lamaj, është vrarë për hakmarrje si ndëshkim për një grabitje objektesh të çmuara, si dhe pasi kishte vendosur të ndërpres një lidhje dashurie.
Mjekët ligjorë kanë konfirmuar se ka qenë një vdekje e dhunshme, ndërsa policia informon se shqiptari ishte një person me precedent penal, i lidhur me trafikun e drogës. Pritet që policia italiane të japë më shumë të dhëna mbi ngjarjen.
