Pesë prokurorë kanë nisur hetimet për shpërthimin e zjarrit në Tetovë, e ndërsa burime jo zyrtare thonë se kanë ndërruar jetë së paku 15 persona. Flakët e zjarrit përfshinë mbrëmë spitalin për trajtimin e të sëmurëve me koronavirus.
Zyrtarisht nuk ka ende një shifër të saktë të personave që kanë humbur jetën, dhe as të atyre që kanë mbijetuar.
“Derisa po lokalizonim zjarrin, nxirrnim edhe viktima edhe të mbijetuar, por për momentin nuk mund të themi sa viktima”, ka deklaruar Sasho Trajcevski nga shërbimi i zjarrfikësve në Tetovë.
Zjarri besohet të jetë përhapur nga shpërthimi i bombolave të gazit apo oksigjenit. Forcave zjarrfikëse u janë dashur 30 minuta për shuarjen e flakëve.
Menjëherë pas kësaj tragjedie me përmasa të mëdha, në Tetovë mbërritën krerët më të lartë të shtetit maqedonas, përfshirë kryeministrin Zaev dhe ministrin e shëndetësisë Filipçe.
Zyrtarët nuk dhanë asnjë deklaratë për mediat nga ambientet e spitalit, dhe menjëherë më pas mblodhën shtabin e menaxhimit të krizave, ndërkohë që për hetimet mbi shkaqet e zjarrit janë angazhuar 5 prokurorë.
