Ish-kreu i bandës së “Çoles”, Myrteza Çaushi ose i njohur ndryshe si Zani, më herët ka kërkuar lirimin e tij me kusht. Edhe pse i dënuar me burg përjetë, Çaushi kërkon që Gjykata e Korçës të ndryshojë vendimin e marrë ndaj tij. Zani Çaushi, më 17 korrik do të paraqesë provat para gjyqtarit Seljadin Pysqili, që ende nuk ka marrë një vendim. Çaushi përmes avokatit të tij mbrojtës, pretendon se ka kryer 25 vite dënim ose ndryshe 3/4 e dënimit dhe ka pasur sjellje të mirë në burg, ndaj kërkon lirimin me kusht.
Kapobanda i lagjes Çole në Vlorë, është dënuar për një sërë ngjarjesh të rënda kriminale të viteve ’97. Gjatë kohës kur vuante dënimin në burgun e Burrelit, ai u martua dhe u bë babai i një djali.
Në një intervistë në News 24, gazetarja Klodiana Lala tha se në fakt Çaushi është martuar prej disa vitesh, me kushërirën e krahut të tij të djathtë Afrim Rami, i njohur ndryshe si Luçiano. Ky i fundit i vrarë disa vite më parë.
Zani është martuar në burgun e Burrelit, pas disa vitesh njohjeje me Arianën. Në një ceremoni private martesore, ka qenë i pranishëm drejtori i burgut, nëna dhe vëllai i Arianës si dhe përfaqësuesit e gjendjes civile. Në fund të shtatorit 2010 erdhi në jetë fëmija tyre i parë që ishte një djalë. Aktualisht Zani Çaushi vuan dënimin në burgun e Drenovës.
