Vijojnë largimet nga rradhët e Lëvizjes Socialiste për Integrim. Këtë herë është ish-drejtori i portit të Durrësit dhe ish-drejtori i Aviacionit Civil, Aleksandër Lipivani i cili ka vendosur t’i bashkohet Partisë Socialiste.
Lipivani ka vendosur të bashkëngjitet me Partinë Socialiste dhe kryeministrin Edi Rama. Kjo lëvizje vjen pas dy të tjerave që ndodhën në ditët e fundit.
Së fundmi, ish-ministri i Drejtësisë Nasip Naço, një zë i rëndësishëm brenda radhëve të LSI-së, vendosi t’i bashkohet PS. Nga Berati, ku u shfaq krah ministrit Blendi Klosi, ai tha se Shqipëria nuk ka nevojë për eksperimente, dhe se është me të majtën progesiste.
Edhe ish-ministri tjetër Lefter Koka, zgjodhi t’i bashkohet PS dhe braktisi LSI-në. Mbetet për t’u parë nëse do ketë largime të tjera nga kjo forcë politike.
