Tirana ka mposhtur Laçin me rezultatin e thellë 3-0 në ndeshjen e parë cerekfinale të Kupës së Shqipërisë të zhvilluar në stadiumin “Selman Stërmasi”. Bardheblutë e nisën mirë takimin dhe krijuan disa mundësi shënimi, por pjesa e parë u mbyll me rrjeta të paprekura, kjo edhe për meritë të prapavijës laçiane.
Megjithatë skuadra kryeqytetase e shtoi presionin në pjesën e dytë dhe arriti të zhbllokojë rezultatin me anë të sulmuesit anglez, Michael Ngo. Në minutën e 53′ ishte Eni Imami që hodhi një top mjaft të bukur brenda zonës për Michael Ngoonë. Sulmuesi shtatlartë kërcen mbi mbrojtësit dhe me kokë e dërgon topin në rrjetë për 1-0.
Kur mendohej përgjigjja e kurbinasve ishte sërish anglezi që dyfishon shifrat. Hasani i jep një top mjaft të mirë në zonë në minutën e 65′. Ngoo e mbron mjaft mirë sferën, rrotullohet me topin në këmbë dhe përshëndet rrjetën për të dytën herë për 2-0.
Goli i tretë dhe i sigurisë për kryeqytetasit u shënua nga fantazisti shkodran Edon Hasani, i cili pas një rrëmuje në zonë, u gjet në vendin e duhur, për të gjuajtur topin drejt rrjetës.
Minutat në vijim sollën vetëm disa tentativa sporadike të kurbinasve, që kërkuan të gjejnë minimalisht një gol, por nuk ia dolën të thyejnë portierin Abibi.
Vërshëllima përfundimtare e arbitrit la në fuqi fitoren 3-0 të bardhebluve, të cilët tashmë do të luajnë për formalitet ndeshjen e kthimit, para se të mendojnë për gjysmëfinalen.
