Një tjetër shtetas është vënë në pranga, pasi ka tentuar që të korruptojë efektivin e policisë. Blutë e Tiranës kanë ndaluar në rrugën “Karl Gega” drejtuesin e mjetit me inicialet R. Y, 35 vjeç, i cili po drejtonte mjetin pa vendosur rripin e sigurisë dhe pa kryer kontrollin teknik. Për të mos u penalizuar, i riu tentoi t’i jepte rryshfet efektivit të patrullës. Gjatë kohës që punonjësi i policisë e pyet se çfarë është ajo që po i jep, i riu i drejtohet duke i thënë “Pije një “kafe”.
Polici: Ishe pa rrip sigurimi, paraqit edhe letrat e tjera.
Qytetari: Po mir mor burrë…
Polici: Ça i ke këto mor zotëri?
Qytetari: Pije një “kafe” vet…
Polici: Pse ta pij kafen unë? Kam një rast korrupsioni te “Karl Gega”. Zotëri ke tentuar të korruptosh punonjësin e policisë.
Qytetari: Ça po të korruptoj mor burrë, po më korrupton thotë.
Polici: Po.
Qytetari: Ashtu e? O ma thuaji babit të marrë një çikë atë shokun e vet në telefon!
Polici: Më jep një çikë patentën.
Njoftimi i policisë
Policia Rrugore e Tiranës arreston një tjetër drejtues mjeti për mitëdhënie.
Në funksion të patrullimeve me përzgjedhje, ne zona të ndryshme të qytetit te Tiranës, rrugorët e kryeqytetit kanë ndaluar në rrugën “Karl Gega” drejtuesin e mjetit me iniciale R. Y, 35 vjeç, i cili po drejtonte mjetin pa vendosur rripin e sigurisë dhe pa kryer kontrollin teknik.
Arrestimi i këtij shtetasi u be për veprën penale te parashikuar nga neni 244 i Kodit Penal “Korrupsion aktiv ndaj personave qe ushtrojnë funksione publike”, pasi gjate kontrollit policor, me qëllim shmangien e penalizmit, drejtuesi i automjetit i ka ofruar agjentit verifikues një shumë lekësh.
Gjatë 25 ditëve të para të këtij viti, Policia Rrugore e Tiranës ka goditur tre raste të mitëdhënies, ku kanë përfunduar në pranga drejtuesit e mjeteve që kanë tentuar të korruptojnë punonjësin e Policisë rrugore me qëllim shmangien e masës administrative për shkeljen e konstatuar nga punonjësit Policisë rrugore në shërbim.
