Aleksandar Vuçiç ka lëshuar kritika ndaj ndërkombëtarëve që nuk kanë reaguar ndaj deklaratës së ish-kryetares së ekipit negociator të Prishtinës, Edita Tahiri. Kjo e fundit është shprehur se “nëse Serbia nuk e njeh Kosovën brenda kufijve ekzistues mund të ketë luftë”.
Lidhur me këtë thirrje, Vuçiç tha: “E gjithë kjo lejohet nga diplomatët perëndimorë dhe nga shqiptarët, derisa ne nuk guxojmë të flasim, nuk guxojmë të kemi mendime të ndryshme. Kur Edita Tahiri thërret për luftë, asnjë ambasadë s’e thotë një fjalë. Ajo tha se ‘do të ketë luftë’ dhe kjo nuk është vetëm një thirrje”.
Ndër të tjera, presidenti serb theksoi se kjo thirrje nuk i frikëson ata, por do të ishte diçka e tmerrshme për çdokund. “Ne do të luftojmë për paqe dhe t’i lusim ata që mendojnë se po luftojnë me dikë, të mos e bëjnë këtë. Jo sepse ne jemi tmerrësisht të frikësuar por sepse kjo do të ishte tmerrësisht e keqe për çdokënd. Kjo është përgjigjja ime e vetme.”
