Pas takimit me kryeministrin e Kosovës, Avdullah Hoti, presidenti Hashim Thaçi ka thënë se nuk do të lejohet që procesi i dialogut të zbres në nivel teknik. Për Thaçin, me rëndësi është që bashkëpunimi i institucioneve të jetë efektiv.
“Në këtë kuadër ishte edhe takimi me kryeministrin Hoti. Është jetik që të ndodhë ky bashkëpunim mes institucioneve. Diskutuam për çështjen se si ta kalojmë sa më mirë, sa më lehtë e sa më shpejtë gjendjen me COVID-19”, ka thënë Thaçi.
Po kështu është diskutuar edhe për çështje që kanë të bëjnë me zhvillimin ekonomik, por edhe për dialogun mes Kosovës dhe Serbisë.
“E kam mirëpritur emërimin e Skënder Hysenit. Është me interes që të ndodhë ky dialog, sepse vetëm me dialog, takime dhe fqinjësi të mirë, Kosova mund të lëviz drejt perspektivës evropiane. Por në të njëjtën kohë duhet të ruajmë identitetin tonë. Në asnjë rrethanë të mos lejojmë që ky proces të zbres në një nivel teknik”, ka theksuar presidenti Thaçi.
Sipas tij, duhet të ndodhë njohja reciproke, respektimi i plotë i integritetit territorial e pastaj edhe zgjidhja e çështjeve të tjera.
