Kryeministri në detyrë Albin Kurti, ka hedhur akuza ndaj Presidentit të Kosovës, Hashim Thaçi, për të cilin tha se ka krijuar një ujdi të brendshme me homologun e Serbisë, Aleksandër Vuçiç, mbi projektin e ndarjes së Kosovës. Këtë deklaratë të fortë ai e ka dhënë mbërëmjen e sotme, në emisionin “Ilva Now”, ndërsa foli për skenarët e mundshëm.
Duke qëndruar në të njëjtën linjë, Kurti tha se projekti për ndarjen e Kosovës është i papranueshëm.
“Kemi herën e parë në këtë shekull, që një lider i Kosovës dhe i Serbisë nuk kanë ndërmjetësim ndërkombëtar. Ata kanë hyrë në ujdinë e brendshme për çështjen e shkëmbimit territorial, që për mua është një eufemizëm për ndarjen e Kosovës.
Ndarja e Kosovës është projekt i kamotshëm i Serbisë, dhe ai merr forma të ndryshme. Të gjitha këto janë ambalazhe të ndryshme të të njëjtit plan, që është ndarja e Kosovës. Dhe kjo është e papranueshme për mua si kryeministër, si shqiptar dhe si njeri”, u shpreh Kurti.
Kurti deklaroi se ata që kanë lançuar apo iniciuar ndarjen apo shkëmbimin territorial mes Kosovës dhe Serbisë, do të marrin si këmbim “turpin e madh”.
“Ata që lançuan projektin e shkëmbimit territorial do t’u ngelet turpi, ndërsa Kosovës komplet territori i saj. Ne nuk duhet të japim, ne kemi vuajtur dhe kemi aq shumë humbje në njerëz”, shtoi Kurti.
