71-vjeçari Lefter Zhidru është ekzekutuar dje nga forcat e policisë në qytetin e Elbasanit. Ai për 5 orë ka terrorizuar qytetin, duke qëlluar me armë zjarri nga ballkoni i banesës. Ngjarja e rëndë ka ndodhur në lagjen “11 Nëntori”, teksa fillimisht ka qenë ish-gruaja e 71-vjeçarit që ka njoftuar policinë pas sherrit në familje me ish-bashkëshortin.
Ndërsa rreth orës 13:30, pas mbërritjes së policisë, 71-vjeçari ka bërë rezistencë duke qëlluar në drejtim të efektivëve për më shumë se 20 herë, teksa ka plagosur 2 kalimtarë, L. S., 22 vjeç dhe A. K., 21 vjeç, të dy jashtë rrezikut për jetën.
Gazetari investigativ Artan Hoxha tha mbrëmjen e djeshme në emisionin “Opinion”, se 71-vjeçari shikonte nga televizori jo vetëm çfarë ndodhte, por thoshte se ato nuk janë të vërteta.
“Ai duket që ka pasur një të kaluar ushtarake. RENEA ka shpëtuar një katastrofë. RENEA nuk dinte se çfarë ka pasur në godinë. Ai shikonte nga televizori jo vetëm çfarë ndodhte, por edhe fjalët dhe thoshte se ata që thonë në media nuk janë të vërteta”, u shpreh Hoxha.
Forcat Shqiponja dhe Patrulla e Përgjithshme e RENEA-s i bënë thirrje të moshuarit të dorëzohet, por ai vijoi të bëjë rezistencë duke qëlluar vazhdimisht në drejtim të policisë. Ndërkohë rreth orës 18:10, policia mësohet të ketë ndërhyrë.
Në banesë u gjetën disa kallëpe tritoli, afro 1 kg, të cilat ishin bërë gati për shpërthim, pasi ishin montuar dhe kapsollet plasëse. Po ashtu u gjet dhe një çantë, e cila dyshohet me eksploziv, nga e cila dilnin tela, të cilët dyshohet se do të përdoreshin për shpërthim. Tritoli ndodhej pranë një bombole gazi dhe nëse viktima do e kishte aktivizuar, atëherë do kishte katastrofë.
Pse rrogat rriten në letra, por varfëria rritet në realitet?
