Operacioni i kërkim-shpëtimit në rrënojat e banesave që la pas tërmeti i 26 nëntorit ka ndaluar në zonën e Thumanës.
Sipas Ministrisë së Mbrojtjes ekipet shqiptare dhe të huaja kanë ndërprerë punën pasi nuk ka informacion për trupa të tjerë nën rrënoja.
Fatkeqësisht mbrëmjen e djeshme nga pallatet e shembura janë nxjerrë edhe 3 trupa të pajetë.
Ndërsa në Durrës operacioni për kërkimin e njerëzve vazhdon me intensitet të lartë. Kushtet atmosferike e kanë vështirësuar disi situatën por ekipet e shpëtimit nuk kanë ndaluar punën e tyre.
Prej 26 Nëntorit, Shqipëria është goditur nga një valë tërmetesh ku më i forti ka qenë i shkallës 6.4 Rihter. Zonat më të dëmtuara janë Durrësi dhe Thumana.
Deri tani bilanci i viktimave është 39 sipas Ministrisë së Mbrojtjes, ku mes tyre ka 4 fëmijë. Qeveria ka shpallur gjendjen e jashtëzakonshme në Tiranë dhe Durrës, ndërsa dita e mërkurë ishte ditë zie kombëtare.
