Të martën në Tiranë, do të zhvillohet një nga ngjarjet më të rëndësishme për turizmin në Shqipëri.
Për herë të parë, Tirana do të bëjë bashkë ministrat e turizmit të të gjithë rajonit, nga Italia e Greqia, te Kroacia, Sllovenia, e Serbia.
Të gjithë bashkë në një Samit Ndërkombëtar për Turizmin. Por nuk do të jenë vetëm ministrat, por edhe agjencitë lidere të turizmit në rajon, përfaqësues të hoteleve më të rëndësishme, të gjithë operatorët turistikë në vend, të gjithë kryetarët e bashkive, ministra dhe kryeministri Rama në eventin më të rëndësishëm për turizmin, të organizuar ndonjëherë në Shqipëri.
“Turizmi, Solidaritet dhe Qëndrueshmëri”, është tema e samitit që po sjell në Tiranë, elitën e turizmit ndërkombëtar në rajon, që këtë herë vjen të mësojë nga Shqipëria, një leksion solidariteti të rrallë për turizmin.
Raportohet se ministria e Turizmit dhe Mjedisit në bashkëpunim me UNWTO do të mbajë këtë Samit Rajonal të Turizmit më 14 janar.
Fatkeqësitë natyrore si tërmeti i 26 nëntorit krijojnë kriza të cilat i vënë njerëzit përballë nevojës për strehim të menjëhershëm.
Samiti “Turizmi Solidaritet dhe Qëndrueshmëri”, ku do të flasin dhe debatojnë nga kryeministri Edi Rama, të gjithë ministrat e rajonit dhe shumë nga zërat më të rëndësishëm të zhvillimit të turizmit ndërkombëtar, do të moderohet nga gazetarja Rudina Xhunga.
