Ish-ministri i Brendshëm, Fatmir Xhafaj, komentoi situatën e krijuar në vend pas goditjeve të tërmetit 5.8 ballë, në 21 shtator.
Në fjalën e tij të mbajtur në foltoren e Kuvendit, Xhafaj tha se shumë banorë janë prekur, dhe se ka dëme të konsiderueshme materiale në qarqet Tiranë dhe Durrës.
Më tej, ish-ministri akuzoi opozitën se e shfrytëzoi fatkeqësinë natyrore për të bërë politikë. Xhafaj renditi edhe masat që duhen marrë, me qëllim evitimin e pasojave të frikshme që mund të vijnë nga fatkeqësitë natyrore.
“Tërmetet dhe fatkeqësitë e tjera natyrore nuk mund t’i parashikojmë, por dëmet e mëdha mund t’i parandalojmë. Qeveria do t’i bënte një shërbim të mirë vendit nëse në reflektim të kësaj që përjetuam dhe nevojës për t’u përballur me to, të përgatiste dhe të bënte shumë shpejt publike një strategji të qartë reflektimi të shoqëruar me një plan serioz veprimi.
Më së paku, është domosdoshmëri nevoja për evidentimin shkencor të dëmeve, një hartë të re sizmike të vendit, ndërmarrja e një analize shkencore për të përcaktuar zonat problematike që sjellin risqe të mëdha nga tërmetet, për shkak të ndërtimeve të paligjshme, rezervuarët, digat, urat. E kemi të domosdoshme për të ngritur apo përmirësuar institucionet shkencore të këtyre fushave.
Përmirësimin e rregullave të ndërtimit, kontrollin e ndërtimeve, përgjegjësitë ligjore për këtë, mungesën e hapësirës për gjendjen dhe veprimin e emergjencës për situata të tilla dhe miratimin e protokolleve në situata të tilla. Ky tërmet i mirë na paralajmëroi, ne duhet të veprojmë, nesër mund të jetë shumë vonë”, theksoi Xhafaj.
