Kryeministri Edi Rama ka reaguar në një kohë të shpejtë, pas lajmit për arrestimin e kryebashkiakut të Lushnjës. Në një postim në rrjetet sociale, Rama shprehet se Fatos Tushen nuk mund ta mbrojë PS-ja, e duhet të përgjigjet vetë përpara drejtësisë.
“Çdo zgjedhës duhet ta dijë se besnikëria jonë ndaj tij nuk varet nga asnjë individ, po është flamur beteje i PS për ta bërë Shqipërinë të ardhmen tonë dhe çdo i zgjedhur nuk duhet ta harrojë se flamuri i PS s’mund të bëhet mbulesa e askujt, për asnjë interes apo faj vetjak. Kryetari i Bashkisë së Lushnjës dhe cilido tjetër i akuzuar nga drejtësia në këtë rast apo në çdo rast, nuk do të ketë asnjë mbrojtje nga Partia Socialiste e duhet të përgjigjen vetë para drejtësisë, me avokatët e tyre e me gojën e tyre! PS u shërben zgjedhësve jo të zgjedhurve”.
Çdo zgjedhës duhet ta dijë se besnikëria jonë ndaj tij nuk varet nga asnjë individ, po është flamur beteje i PS për ta bërë Shqipërinë të ardhmen tonë dhe çdo i zgjedhur nuk duhet ta harrojë se flamuri i PS s’mund të bëhet mbulesa e askujt, për asnjë interes apo faj vetjak.
— Edi Rama (@ediramaal) July 6, 2021
Kryebashkiaku i Lushnjes, Fatos Tushe dhe 11 bashkëpunëtorë të tij janë arrestuar nga SPAK, pasi janë të përfshirë në një tender abuziv të ditëve të fundit, prej 24 mln lekë për rehabilitimin e kanalit ujitës.
Tushes i janë vënë prangat në zyrën e tij, e ndërsa nga sa është mësuar deri më tani kreu i këti grupi ishte Flamur Peqini, kreu i Ndërmarrjes së Pasurive Publike dhe njëherazi ish- kreu i Inspektoratit të Ndërtimit në Lushnje. Favorizimi i një kompanie për rehabilitimin e një kanali vaditës në Lushnjë me vlerë 24 mln lekë, duket se është bërë shkak i akuzave për kryebashkiakun Tushe.
Kryebashkiaku i Lushnjes, Fatos Tushe është arrestuar me urdhër të Prokurorisë së Posaçme (SPAK). Mes të arrestuarve është edhe Flamur Peqini, ish-kreu i Inspektoratit të Ndërtimit në Lushnje i cilësuar si “koka” i grupit, Gazment Çela zv. drejtor i Ndërmarrjes së Pasurive Publike dhe Xhemal Hasko përgjegjësi i ujit në Bashkinë Lushnje.
