Bashkëshortja e Mark Kodrës i cili i mori jetën një 25-vjeçari me pretekstin se i ngacmonte vajzat, ka dhënë dëshminë e saj e cila ndryshon rrjedhën e ngjarjes. Ajo ka rrëfyer para mediave se si kishte nisur konflikti mes palëve, e që përfundoi me vdekjen e një të riu. Një sherr mes dy personave, përfundoi me rrëmbimin e një arme dhe më pas duke shtënë mbi Emiljano Ndoun.
Emiljano Ndou u ekzekutua pasi u qëllua me kallashnikov, në afërsi të një kalçetoje në fshatin Bardhaj. Pak pas ngjarjes, u vu në pranga edhe autori i ekzekutimit, Mark Kodra.
Bashkëshortja e autorit 47-vjeçar, Bukuroshe Kodra, ka deklaruar para mediave se fillimisht, viktima është zënë me një nga djemtë e çiftit. Ajo u shpreh se Ndou ka sharë dhe më pas është konfliktuar fizikisht me djalin e çiftit Kodra. Kodra mohon që vrasja të ketë ndodhur pasi viktima i ka ngacmuar vajzat. Sipas saj, viktima ishte problematik dhe ka qenë ai që ka nisur konfliktin. Autori është baba i 7 fëmijëve, ndërsa bashkëshortja e tij tha se nuk kanë pasur asnjë konflikt me familjen e viktimës.
“Konflikt me djalin, është zënë. Konflikti me djalin ka ndodh se ka ecur me motor dhe i ka thënë më avash. Mbrëmë e ka zënë te një lokal dhe i ka thënë çfarë pate atë natë. Ky i ka thënë ka mbaruar, ai i ka thënë që për mua s’ka mbaruar dhe i ka thënë që të shtie në goma të motorit dhe i ka rënë ai.
E ka sharë, i ka rënë. Erdhi në shtëpi dhe tha që më ka rënë, por u mbyll ajo punë për ne. Ky erdhi, doli prapë dhe kur u kthye burri, mori automatikun dhe i ra. E ka dhënë edhe në televizor se ka pasur probleme me femrat, por nuk kemi pasur problem me të më. Nuk kemi pasur kurrgjë me të tjerët”.
Bukuroshe Kodra ka treguar se ngjarja e rëndë ka ndodhur në orën 23:00 të natës. Ajo është përpjekur që t’ia ndalë armën bashkëshortit, por ai ka vijuar derisa ka qëlluar mbi 25-vjeçarin.
“Ai ka dalë prej atje dhe ka ardhur e ka ndalur këtu. Ka ndalur shpejtësinë e motorit. Ka dalë burri me automatik dhe ia kam ndal armën për mos me i ra. Është larguar dhe i ka ra”, tha ajo.
