Një ditë pasi Kuvendi miratoi me 80 vota pro paketën “anti-shpifje”, dhjetëra studentë të Rezistencës Rinore kanë dalë sot në protestë para Kryeministrisë kundër censurës së medias.
Sipas tyre, miratimi i kësaj pakete i jep kontroll të madh AMA-s dhe AKEP-it mbi mediat online.
Në shenjë simbolike, studentët kanë vendosur disa televizorë në tokë, pranga dhe etiketa ku shkruhet “gjobë”. Më pas janë shtrirë rreth tyre me shirita të zinj në gojë e pankarta të shumta me mesazhe kundër censurës.
Një nga përfaqësuesit e Rezistencës, Arben Meta iu bëri thirrje personave që mbështesin paketën anti-shpifje që të mendojnë për pasardhësit e tyre.
“Rikthim i nenit 55 të Republikës Popullore të Republikës së Shqipërisë për agjitacion e propagandë. Ky ligj ishte një nga arsyet që diktatura qëndroi aq gjatë në këmbë.
Dy janë shtyllat kryesore të demokracisë: e para është gjykata dhe drejtësia që ne e dimë si ka përfunduar dhe e dyta është media e lirë që ne po e shikojmë se si po e pëson. Këta televizorë janë për t’i treguar zotit Kryeministër që në qoftë se ne para disa viteve kishim vetëm një kanal që ishte TVSH sot kemi një kanal televiziv nga i cili do përcillen të gjitha lajmet që është ERTV.
Këtë nuk mund ta pranojmë, ndryshe ne do t’i kthenim kurrizin aspiratës sonë për në BE. Kam një mesazh për të gjithë mbështetësit e kësaj pakete, mendoni për fëmijët tuaj. Ky është kthim i një diktature moderne”, tha përfaqësuesi i studentëve.
