Gjatë një takimi me të rinjtë, kryetarja e LSI-së, Monika Kryemadhi, ka ironizuar deklaratën e Ministres së Arsimit se do të largohet nga qeveria dhe Shqipëria pas mbarimit të mandatit. Ajo ka thënë më ironi se Besa Shahini para se të largohet, t’u tregojë të gjithë të rinjve se “çfarë bëri Turi”, një pyetje në tezat e maturës së këtij viti që shkaktoi shumë polemika. Kryetarja e LSI-së, Monika Kryemadhi thotë se Shahini duhet të mbajë përgjegjësi për atë çfarë ka bërë në krye të Ministrisë.
“Në besojmë te të rinjtë dhe duke besuar te të rinjtë, arritëm gjithmonë për të fituar beteja të rëndësishme. Dhe në fakt për një familje gjëja më e rëndësishme janë fëmijët. Për një familje, arsimimi i fëmijëve është më i rëndësishmi.
Për një familje, e ardhmja e fëmijëve është më e rëndësishme. Prindërit për fëmijët bëjnë çdo gjë. Prindërit për fëmijët japin jetën dhe ne si LSI gjithë bazën tonë, gjithë forcën tonë e kemi te të rinjtë dhe aty do investohemi. Tek angazhimi i të rinjve për t’u përfshirë ata, për të qenë pjesë e vendimmarrjes.
Një pjesë e juaja kanë qenë viktimë e maturës shtetërore, një pjesë tjetër janë ende të pasigurt se çdo të ndodhë me maturën shtetërore dhe pastaj dëgjojmë që ministrja thotë që “unë do iki tani se mbarova punë, dhe nuk rri më në Shqipëri”.
Si mund të ikë ajo pa dhënë llogari për atë çfarë ka bërë? Më e pakta të na japë përgjigje se çfarë bëri Turi. Mos lejoni që të vendosin të tjerët për fatin tuaj! Vendosni ju për fatin tuaj!”, tha Kryemadhi.