Politikë

“Të arrestohen politikanët e korruptuar”, ish-deputeti reagon ndaj përgjimeve

               Publikuar në : 22:25 - 26/06/19 Enno

Ish-deputeti i PD-së, Agron Shehaj ka folur rreth përgjimeve të Bild, duke akuzuar Gjiknurin se ai gënjen kur “justifikon bashkëpunimin me kriminelët”.

Nëpërmjet një postimi në Facebook, Shehaj shprehet se arrestimi i politikanëve të korruptuar është e vetmja mundësi që populli shqiptar të dalë nga mjerimi.

“Në vendin më të varfër dhe të korruptuar në Evropë, arrestimi i politikanëve të korruptuar si Rama, Gjiknuri, Dako, Veliaj etj, që mendojnë se janë mbi ligjin, jo vetëm që është i mundur por është e vetmja mundësi që ka populli shqiptar për të dalë nga mjerimi”, shkruan ish-deputeti.

Ai e përmbyll postimin e tij duke thënë se në qoftë se politikanët nuk ndëshkohen, “shqiptarët do të vuajnë nga varfëria, autokracia dhe izolimi edhe për shumë dekada”.

Postimi i Shehajt:

Mënyra si Damian Gjiknuri gënjen dhe justifikon me pafytyrësi bashkëpunimin me kriminelë tregon se ai nuk e ka problem të bëjë asgjë, as vjedhjen, as krimin. Sot juristi, deputeti, dhe 6 vjet ministri Gjiknuri tregoi qartë edhe se cili është koncepti i tij sundimit të ligjit: ata kishin ca të fortë, prandaj edhe unë mora ca të fortë kundër të fortëve të tjetrit!

Ish ministri dhe kryetari i komisionit për reformën zgjedhore pavarësisht se u kap duke vjedhur dhe transferuar 20 mln euro në Delaëare, u përgjua duke blerë votat dhe duke bashkëpunuar me krimin në zgjedhjet e 2015, as nuk u mor i pandehur dhe as nuk u thërrit në pyetje nga prokuroria. Në vendin më të varfër dhe të korruptuar në Europë, arrestimi i politikanëve të korruptuar si Rama, Gjiknuri, Dako, Veliaj etj, që mendojnë se janë mbi ligjin, jo vetëm që është i mundur por është e vetmja mundësi që ka populli shqiptar për të dalë nga mjerimi.

Po nuk mori fund pandëshkueshmëria e politikanëve, shqiptarët do të vuajnë nga varfëria, autokracia dhe izolimi edhe për shumë dekada.

Kthehu
WhatsApp Denonco ne TT