9 raste të reja janë konfirmuar me koronavirus në Shqipëri gjatë 24 orëve të fundit, (51 në total), ndërkohë që nuk ka një zgjerim të hartës së qyteteve të prekura. Sa i takon frikës së qytetarëve nëse ka staf për të përballuar fluksin, ose nëse janë tamponët mjaftueshëm, Zv. ministrja e Shëndetësisë, Mira Rakacolli ka treguar si është situata.
Ajo është shprehur se numri i tamponëve është i mjaftueshem për ata persona që janë të dyshuar, dhe jo për çdo person që ka vizituar vende të prekura nga COVID-19. Zv.ministrja e Shëndetësisë shtoi më tej se në rastin e pandemisë, përzgjidhen ata persona të cilët kanë nevojë dhe janë të dyshuar ta marrin tamponin.
“Marrja e tamponëve nuk është një dëshirë e qytetarit, siç po rezulton deri tani. Në rastin e pandemisë, përzgjidhen ata persona të cilët kanë nevojë dhe janë të dyshuar ta marrin tamponin. Ky vlerësim bëhet nga ekspertët në bazë të kritereve të përcaktuara nga ekspertë të OBSH dhe siç e bën e gjithë Europa.
Ne po përballemi me një fenomen, që çdo person që mendon se ka qenë në vendet ku ka COVID, vjen e kërkon të bëjë testin, se mendon se është i infektuar pa pasur asnjë shenjë klinike dhe asnjë të dhënë që të ketë qenë në kontakt me persona të konfirmuar me COVID.
Ndaj ju lutem qytetarë, besojini specialistëve për ata që kanë nevojë ta bëjnë këtë test. Tamponat janë krejtësisht të mjaftueshëm për ata persona që janë realisht të dyshuar”, përfundoi ajo.
