Ministrja e Shtetit për Marrëdheniet me Parlamentin, ka ironizuar nga Kuvendi ish-kryeministrin Sali Berisha, lidhur me protestën e sotme. Ajo ka sulmuar Berishën, duke i thënë se po e përdor këtë protestë për t’u rikthyer në pushtet.
“Duke notuar në gotën e ujit, gota na duket oqean e çdo puhizë e quajmë fortunë, pa parë dot më larg se e nesërmja. Mungesa e vetëdijes kombëtare mund të konsiderohet një nga mëkatet më të mëdha të kësaj salle. Shembullin më të qartë të kësaj politike të mbrapshtë sa e dëgjuat. Është krijuar bashkëjetesë fatale mes asaj që janë realisht çështjet e Shqipërisë e hallet e politikës.
Politika i ka tregtuar e jo pa sukses hallet e saj, si hallet e publikut dhe Shqipërisë. Në emër të kësaj, qytetarë janë derdhur në sheshe kanë protestuar, janë ndeshur me njëri tjetrin e janë vrarë. Janë zënë e ndarë, janë ndeshur si tifozë për këta që vijnë helmojnë podiumet këtu, kurse loja bëhej gjetkë. Por ne jemi pak për t’u ndarë kaq shumë me njëri-tjetrin për hir të tyre e këtyre hijeve të vjetra. Grisni vetëm për një çast ambalazhin e do shihni se gjithçka ka një kuptim e thelb tjetër”.
Pas fjalës së ministres Elisa Spiropali në Kuvend, ka reaguar deputetja Jorida Tabaku. Kjo e fundit tha se Spiropali po bënte një llogore fjalësh pa kuptim, ndërsa i kërkoi falje ambasadorit boshnjak për këtë skenë, të shëmtuar siç e quajti ajo.
“Kam shumë argumente për të thënë për keqqeverisjen. Por të dëgjosh në denoncimin për gjenocidin e Srebrenicës, llogore fjalësh pa kuptim e të papranueshme. I kërkojmë ndjesë ambasadorit për këtë skemë të shëmtuar”, tha Tabaku.
Spiropali: T’i do shkosh në protestë?
Tabaku: Se çfarë bëj unë, atë e di unë!
