Sigmund Frojd, është “babai’ i psikoanalizës, dhe interpretimit të ëndrrave. Ai ndihmoi mijëra pacientë të çliroheshin nga psikozat që i mundonin. Por edhe ai vetë kishte vese, frikëra, fiksime apo sjellje të çuditshme.
Frojdi vuante shpesh nga dhimbjet e tmerrshme të kokës, të cilat psikoanalisti u përpoq t’i shëronte duke përdorur kokainë. E zbuloi këtë drogë, që në moshën 28 vjeçare, dhe nisi ta përdorte si një ilaç kundër ankthit, por u bë i ndërvarur prej tij.
Ndërkohë, ai ishte i fiksuar pas numrit 62. Besonte se do të vdiste në moshën 62-vjeçare, ndaj nuk fjeti kurrë në një dhomë hoteli me atë numër. Dhe në fakt, jetoi deri në moshën 83-vjeçare. Zakonet e tij të jetës së përditshme, ishin shumë strikte. Paraditen ua kushtonte pacientëve, hante çdo ditë drekën në orën 13:00. Pas drekës, dilte për një shëtitje prej 3 kilometrash, duke ndjekur gjithmonë të njëjtat rrugë.
Në garderobën e tij, mbante vetëm 3 palë kostume, 3 palë të brendshme dhe 3 palë këpucë. Frojdi i adhuronte purot, dhe pinte 20 të tilla në ditë. Për shkak të purove dhe cigareve që pinte kur ishte i ri, u prek nga një tumor i rëndë në fyt, që çoi edhe në vdekjen e tij në vitin 1939. Edhe pse u nominua 12 herë për Çmimin Nobel, nuk arriti që ta fitojë asnjëherë atë./ Tirana Today
