Risia që u aplikua për herë të parë në kampionatin shqiptarë me ligjin e ri të miratuar nga Parlamenti rezultoi një dështim që në ndeshjen e hapëse të sezonit. U vendos që Policia e Shtetit të qëndronte jashtë stadiumit dhe mbarëvajtjen e ndeshjes ta siguronte policia private.
Gjithsesi dështimi ishte i qartë që në ndeshjen Skënderbeu-Partizani, ku pati përleshje masive mes dy tifozerive dhe u desh ndërhyrja e Policisë së Shtetit që të rifillonte ndeshja pas 15 minutash ndërprerje.
LEXO EDHE: Apeli i fortë i Gjicit: Policia të marrë përgjegjësitë ose bllokojmë kampionatin
I pari që ngriti zërin për këtë çështje ishte presidenti i Kukësit, Safet Gjici. Një ditë më parë ai kërkoi që në rast se nuk kthehet në stadium Policia e Shtetit dhe të marrë përsipër mbarëvajtjen e ndeshjeve klubet duhet të bëhen të gjitha bashkë dhe të bojkotojnë kampionatin. Sipas ti është ende herët për të aplikuar këtë rregull të ri, pasi tifozeritë nuk janë aq “të pjekura” dhe në ndeshje të forta mund të rikthehet sërish dhuna.
I pari që i është përgjigjur kësaj thirrje është presidenti i Skënderbeut, Ardian Takaj. Numri një i korçarëve ka renditur dy arsye pse duhet të rikthehet në stadium policia e shtetit. Së pari, sipas Takajt, kostoja e policisë private është shumë e lartë dhe gati-gati e papërballueshme nga presidentët e klubeve të Superiores, që janë edhe organizatorët e takimeve të kampionatit.
Së dyti, presidenti korçar thekson se përtej kostove, policia private nuk ka mundësi të rregullojë mbarëvajtjen e takimeve të mëdha, mes skuadrash që pretendojnë për objektiva madhorë dhe mes tifozërish të zjarrta.
