Janë dashur vetëm 5 minuta për të kryer grabitjen në Rinas. Këtë fakt e dha gazetari Ermal Vija mbrëmjen e djeshme në emisionin “Opinion”. Sipas tij, grabitësit që dyshohet të jenë 4, kanë qenë të mirë përgatitur.
Ai tha se ata kishin dijeni për gjithë transfertën dhe për orarin e saktë kur nisej avioni. Sipas dëshmive të tjera, grabitësit kanë hyrë lehtësisht në mjediset e aeroportit, duke qenë se automjeti i tyre mbante mbishkrimin “Hetimi tatimor”, që dyshohet të jetë falsifikuar. Ata kanë përdorur më pas maskat, ndërsa kanë qenë të veshur me uniforma ushtarake, dhe të armatosur me kallashnikovë, pistoleta dhe granata dore.
