Kryedemokrati Basha, me anë të një video-mesazhi, ka shprehur shqetësimin e tij në lidhje pandeminë në vend. Në shenjë këmbane alarmi, ai nënvizon faktin se gjendja po përkeqësohet nga dita në ditë, ndërsa bën përgjegjëse qeverinë për këtë situatë të rëndë.
Kreu i PD-së shprehet se aktualisht vendi ynë gjendet në krizë shëndetësore dhe ekonomike, pa asnjë masë dhe pa asnjë plan për menaxhimin e saj.
Kjo pasi kjo qeveri, sipas tij, ka dështuar të menaxhojë situatën. Duke qendruar në të njëjtën linjë, kreu i opozitës citon se ka ofruar alternativa. Po kështu i ka kërkuar kryeministrit Rama të përgjigjet me seriozitetin që i kërkon detyra dhe situata.
Deklarata e plotë:
Numri i atyre që kanë humbur jetën nga virusi, i të shtruarve në spitale dhe i të infektuarve me COVID, po rritet në mënyrë tragjike. Dua t’ju shpreh ngushëllimet e mia të gjithë familjeve që kanë humbur njerëzit e tyre, në betejën me koronavirusin.
Nuk ka gjë me të dhimbshme se pamundësia per tu ardhur ne ndihmë familjarëve dhe të afermve të sëmurë.
Shqipëria ka nevojë për lidership, por për fat të keq sot kjo mungon. Vendi gjendet në krizë shëndetësore dhe ekonomike, pa asnjë masë dhe pa asnjë plan për menaxhimin e saj.
Spitalet janë të mbipopulluara, urgjencat janë përplot me qytetarë që presin ndihmë. Mjekët janë të mbingarkuar, të pambrojtur, pa mjetet e nevojshme për të luftuar sëmundjen. Disa prej tyre e kanë paguar me jetë.
Dua të shpreh mirënjohjen, respektin dhe solidaritetin tim me mjeket, infermierët dhe të gjithë personelin shëndetësor që sot po bëjnë të pamundurën, për tu ardhur në ndihme pacientëve, pa mbështetje dhe në kushte shumë të vështira.
Vendi ka nevojë për lidership ekonomik. Kjo qeveri ka dështuar të menaxhojë situatën. Sot, shqiptarët janë më të kërcënuar, dhe më të varfër se çdo qytetar tjetër në rajon.
Pamundësia ekonomike e ka bërë edhe me të vështirë përballimin e krizës shëndetësore. Shumica e familjeve nuk përballojnë dot kostot e larta të medikamenteve që përdoren për të trajtuar koronavirusin. Kjo është e papranueshme!
Si lideri i opozitës, në këtë situatë shumë të vështirë, me përgjegjësi te plotë kam ofruar alternativa, kam ofruar zgjidhje.
I kam kërkuar kryeministrit të përgjigjet me seriozitetin që i kërkon detyra dhe situata. E vetmja përgjigje është se “fajin e kanë qytetarët”.
Faji nuk është i qytetarëve se ka mungesa të mjekëve, e laboratorëve, e testimeve, e kapaciteteve spitalore.
Nuk është faji i qytetarëve për çmimet më të larta në rajon, të barnave për trajtimin e sëmundjes, rritja e papunësisë dhe pamundësisë ekonomike.
Ne, kemi mbështetur që nga fillimi çdo hap në mbrojtje të shëndetit të njerëzve, dhe kemi ofruar zgjidhje. Por ne bëjmë përgjegjëse qeverinë për mungesën e lidershipit dhe të veprimit nga ana e saj.
Asgjë nuk është më e çmuar sot se jeta dhe shëndeti juaj. Prandaj ju bej thirrje të tregoni maksimumin e vëmendjes dhe kujdesit për të mbrotjur veten, fëmijët, prindërit dhe familjet tuaja.
