Ministrja për Marrëdhënien me Parlamentin, Elisa Spiropali ka reaguar në lidhje me protestën e ditës së djeshme.
Përmes një video-je publikuar në ‘Facebook’, ajo shprehet se nga kjo protestë nuk u mësua asgjë përveç se ajo që dihej, se “kush tenton t’i vërë zjarrin këtij vendi, arrin vetëm të digjet vetë”.
Më tej, Spiropali përgëzoi dhe iu uroi shërim të shpejtë efektivëve të policisë, të cilët sipas saj u goditën nga një çetë punonjësish të bashkive të djathta.
“Protesta e opozitës nuk na mësoi kurrgjë, përveçse na përsëriti atë që dinim qysh prej ditës së parë… kush tenton t’i vërë zjarrin këtij vendi, arrin vetëm të digjet vetë.
Dje u dogj edhe keq shpresa e të paktëve që ende besonin se Sali Berisha, Lulzim Basha dhe Monika Kryemadhi, luftojnë trimërisht për interesat e popullit dhe jo për pushtetin e tyre të humbur.
Pas asnjë ide tjetër përveç shkatërrimit, pa asnjë qëllim tjetër përveç shantazhimit të shumicës me ura zjarri në gju dhe në duar, këta udhëheqës të diskretituar me një çetë punonjësish të bashkive të djathta dhe me një grusht të rinjsh të verbuar nga propaganda e tyre, e sherrit dhe e dhunës, lanë kokrrën e namin në atë që trumbetuan si ditën e ikjes së Edi Ramës dhe të qeverisë”, tha ajo.
Ndërkohë, Spiropali i bën thirrje çdo qytetari që të kuptojnë se alternativa e dhunës dhe rrëmujës, dëmton vetë ata, ekonominë e tij dhe perspektivën e familjes së tij.
“Një thirrje për çdo njeri normal, ndër ata që kanë të gjithë të drejtat e botës të mos të kenë votuar, as të mos e duan këtë qeveri, por duhet ta kuptojnë se alternativa e dhunës dhe rrëmujës, dëmton vetë ata, njeriun normal, dëmton ekonominë e tij, dëmton perspektivën e familjes së tij, të fëmijëve të tij, Shqipëri që ka më shumë nevojë për ide dhe projekte, jo për piskama e kapsolla.
Vetëm një humbës pa fantazi si Lulzim Basha mund të mendojë se do të rikthehet në qeverinë e çadrës së diellit duke shumëzuar çadrat e shiut.
Sidoqoftë, një gjë të mos e harrojë askush… me kapsolla e më zjarre nuk merret pushteti, por vetëm damka e të paaftit për të parë, dëgjuar dhe menduar.
Nga ana tjetër, me këta, pa këta, hyjnë në zgjedhje, s’hyjnë në zgjedhje, ne do të vazhdojmë para dhe do të fitojmë përsëri, jo për vete, por për Shqipërinë që duam”, përfundon Spiropali.
https://www.facebook.com/espiropali/videos/2302807199989460/?t=1
