Për juristin Kreshnik Spahiu, Tirana sot është qytet i pabanueshëm dhe se nuk plotëson asnjë standard për të qenë kryeqytet i Shqipërisë. Në emisionin “Now” në “Euronews Albania”, ai ka shprehur haptazi qëndrimin e tij kritik. Spahiu shtoi më tej se ndoshta një ditë, klasa politike do jetë e detyruar të vendosë në agjendë debatin nëse ky qytet duhet të jetë më kryeqytet apo jo.
“Nëse një ditë do kthehem përsëri në Shqipëri, do ishte qyteti i fundit që do zgjidhja për të jetuar. Tirana sot është qytet i pabanueshëm.
Çdokush që ka pasur mundësinë që të jetojë në Perëndim, e kupton fare qartë se Tirana nuk plotëson asnjë standard për të qenë kryeqytet i Shqipërisë.
Një ditë, shqiptarët dhe klasa politike do jenë të detyruar të vendosin në agjendë, debatin nëse ky qytet duhet të jetë më kryeqytet i Shqipërisë apo jo. Për mua, Tirana është dëmtuar aq shumë, saqë nuk zhbëhet më, as me konfiskime, as me sekuestrime”, theksoi ai.
