Sikundër fundjava e kaluar, të gjithë shqiptarët do ta kalojnë në izolim total. Siç e njoftoi edhe një ditë më parë kryeministri Rama, nga ora 13:00 e ditës së sotme dhe deri të hënën në orën 05:00, të gjithë do të qëndrojnë në shtëpi dhe të gjithë qepenat do të jenë mbyllur.
Po kështu Rama njoftoi se nga e hëna askush nuk del dot më në pazar, pa marrë lejen digjitale me e-mail ose telefon në emër të familjes.
“Gati aplikacioni online, ose me sms për leje-daljen e vetëm një personi nga familja për të bërë pazar. Pas pak do të bëjmë prezantimin e aplikacionit që është shumë i thjeshtë dhe nga e hëna e deri në mbarim të luftës, do të jetë e vetmja rrugë për të dalë nga shtëpia në Tiranë e në qendrat urbane”.
Një model të ngjashëm ndoqi edhe Kina përgjatë epidemisë, ku vetëm një anëtar i familjes lejohej për të bërë pazar një herë në tre ditë.
186 të infektuar, 31 të shëruar dhe 9 viktima. Ky është bilanci i koronavirusit në vendin tonë. Deri më tani 77 pacientë ndodhen tek Spitali Infektiv, ku edhe po marrin trajtimin mjekësor, ndërsa 5 prej tyre janë në gjendje më të rëndë dhe po trajtohen në terapi intesive. Ditën e djeshme ndërroi jetë edhe një 52-vjeçare nga Vlora, e cila vuante nga hipertensioni.
