Mjeku i njohur infeksionist Pëllumb Pipero, është shprehur se nga java e dytë e prillit do zbuten masat e vendosura nga qeveria për karantinimin. Ai ka shuar në këtë formë kureshtjen e qytetarëve, të cilët janë të shqetësuar për çfarë po ndodh.
Në një lidhje me “Skype” me emisionin “Zonë e Lirë”, ai tha se shqiptarët mund të dalin nga karantinimi, vetëm nëse i kanë respektuar masat e dhëna nga qeveria. “Unë mendoj që javën e dytë të prillit do fillojnë të zbuten shumë masat, dhe nëse qytetarët i kanë respektuar masat e krijuara nga qeveria, java e fundit e marsit, java e parë e prillit do zbuten masat”, tha Pipero.
Po kështu ai ka treguar dhe ilaçet që deri tani kanë shëruar 31 pacientë, të cilët ishin shtruar tek Infektivi. Mjeku këtu i referohet edhe marrjes së shembujve nga Kina e Italia.
“Njerëzit e shtruar tek ne kurohen sipas eksperiencës më të mirë të marrë nga Kina, nga Italia dhe vendet e tjera. Kurohen sipas një udhëzuesi që përfshin dy anti-viralë, simptomatikë të tjerë.
Ndërkohë që flasim, ka ardhur një sasi e vogël hidroksilkorine. Në bazë të protokolleve të një kompanie të madhe amerikane, kemi porositur një medikament të ri që është shpresëplotë për trajtimin e koronavirusit”, tha mjeku.