Miliarderi i famshëm George Soros, edhe pse i sulmuar nga e djathta botërore e veçanërisht nga Moska çdo minutë, nuk tërhiqet nga lufta e tij kundër rivalëve apo sulmuesve të tij.
Italia duket se është vendi ku Soros ka përqëndruar betejën e tij politiko-ideore.
Në festivalin e Ekonomisë që është mbajtur në universitetin e Trentos në Italinë e veriut, Soros deklaroi se është shumë i shqetësuar nga afërsia ndërmjet Rusisë së Putinit dhe qeverisë së re italiane.
“Nuk di nëse Salvini është financuar nga Putin, por opinioni italian duhet ta dijë këtë. Ka të drejtë ta dijë”.
I menjëhershëm ka qenë reagimi i ministrit të Brendshëm të Italisë:
“Nuk kam marrë asnjë lirë, asnjë euro, asnjë rublë nga askush. Konsideroj që Putin është një nga burrat e shtetit më të mirë në botë dhe më vjen turp që është ftuar të flasë një nga spekulatorët më të paskrupullt në botë”, tha Salvini.
Soros tha se ishte i shqetësuar me qëndrimet se qeveria italiane do të mbështesë heqjen e sanksioneve ndaj Rusisë.
“Putin nuk do ta shkatërrojë Europën, por kërkon ta shfrytëzojë dhe ta dominojë aë. Ndaj them se marrëdhënia ndërmjet Matteo Salvinit dhe Putinit është shqetësuese”, tha Soros.
Multimiliarderi tha se shpresonte që demokratët të fitonin zgjedhjet parlamentare të midterm-it në mënyrë që Trump të pësojë fiaskon e parë politike.
Sipas tij, Trump e ka kërkuar vetë përplasjen me Europën por edhe me Kinën për tarifat industriale.
“Por e ka parë që Kina është e vetmja fuqi që mund t’i rezistojë dhe tani kërkon të bëjë marrëveshje me të. Kurse prishja e marrëveshjes me Iranin jo vetëm që i bën keq asaj që ka arritur Barack Obama, por dëmton në radhë të parë Aleancën Atlantike”, tha Soros.
