Kreu i Lëvizjes Vetëvendosje, Albin Kurti është shpallur politikani i vitit në Kosovë.
Sipas sondazhit të përvitshëm të gazetës “Koha Jonë”, rreth 97 mijë votues kanë shprehur me votë pëlqimin e tyre për 4 kategori: ‘Politikani i Vitit’, ‘Biznesmeni i Vitit’, ‘Moderatori i Vitit’ dhe ‘Gazetarja e Vitit’.
Sistemi i votimit lejonte që një lexues votonte vetëm 1 herë me anë të IP-së, duke shmangur çdo përsëritje apo votim fiktiv disa herë nga e njëjta pajisje. Votimi ka zgjatur për rreth 2 muaj.
Ndërkohë si ‘Biznesmeni i Vitit’ është zgjedhur Avni Ponari, i njohur ndryshe si pronari i kompanisë më të madhe të sigurimit “Sigal”.
Si gazetarja më e mirë e vitit është shpallur Klodiana Lala, duke u cilësuar nga media kosovare edhe si “modeli i gazetares që i duhet medias”.
Prezantuesja e emisionit ‘Open’, Eni Vasili është shpallur “Moderatorja e Vitit”. Votimi ishte mes Blendi Fevziut, Ylli Rakipit, Sokol Ballës, Artur Zheji dhe Eni Vasilit, por kjo e fundit u zgjodh si e preferuara e publikut kosovar.
