Kryeministri Edi Rama bashkë me kabinetin qeveritar kanë vizituar ditën e sotme disa nga banorët që janë strehuar në një hotel në Durrës.
Ndërkohë i pranishëm në hotelin që vizituan dy zyrtarët ishte edhe Ard Daullxhiu, një personazh i bërë i njohur për publikun në emisionin ‘Zonë e Lirë’. Ministri Klosi është ulur në tavolinë bashkë me të duke i shpjeguar atij dhe të tjerëve të pranishëm, procedurën se si do të veprohet pasi të ikin nga hoteli ku janë strehuar.
Ministri i Turizmit i tha Daullxhiut se duhet të shkojë në bashki dhe të kërkojë kredi ose qira të cilën do e paguajë bashkia.
“Hotelet do bëhen gati për sezonin turistik kështu që avash avash duhet të lëvizin prej andej”, tha Klosi.
“Po s’na e var kush more vlla. Ku të shkojmë, s’na e var njeri ne”, iu përgjigj Daullxhiu.
Kryeministri Rama zhvilloi ditën e sotme në Golem një mbledhje vjetore me ministrat e kabinetit qeveritar. Sipas gazetës Panorama, kohën e tyre të pushimit të drekës, ata vendosën që të vizitonin disa nga banorët e prekur nga tërmeti.
