Në një takim me furnizuesit e naftës, kreu i qeverisë Edi Rama u shpreh se brenda 24 orësh do të kalojë një akt normativ me fuqinë e ligjit dhe qeveria do të hyjë në administrim e furnizimit me naftë.
“Nuk mund të themi se këtu jemi të gjithë njësoj, se s’jemi të gjithë njësoj. Për mos t’u zgjatur, se planin e masave, se planin do e kemi në fund të javës. Përpara të hënës s’do e bëjmë publik. Sot këtu jemi për të parë se ça do të bëjmë me naftën. Ju duhet të jeni të vetëdijshëm se i përkisni asaj pjesë të shoqërisë shqiptare që duhet të bëjë sakrificë. Duhet të ndihmoni që të bëni atë që ishit para se të ishit ata që jeni. Kjo është koha që të mos fitoni, por të mbani barrën me të madhe. Edhe qeveria po ashtu.Të gjithë kanë të drejtë të mbajnë barrën, pasi nuk na detyron me dhunë që të ndahemi nga familjet tona dhe të marrin pushkën këtu dhe gratë dhe fëmijët të shkojnë gjetkë për të shpëtuar kokën. Ka ardhur lufta këtu me faturën përkatëse. Ju do të mbani pjesën tuaj. S’mund të ndodhi që ju të fitoni. Asgjë më shumë se çfarë ju duhet që të mbështesni dhe të ndihmoni popullin shqiptar. ne do të kalojmë brenda 24 orëve një akt normativ me fuqinë e ligjit dhe qeveria do të hyjë në administrimin e ligjit bashkë me ju, përmes një bordi kombëtar të furnizimit me karburant”, tha Rama.
Kryeministri Edi Rama u shpreh më tej se qeveria ka bërë sforco për të mos rritur çmimin e energjisë, nga e cila preket pjesa më e madhe e popullsisë. Ai tha se shteti do të vendoset në ndihmë të biznesit të vogël dhe familjarëve, por shtoi se ata që kanë makinë, do të mbajnë një barrë më të madhe se sa ai që nuk e ka një të tillë.
“Ato që janë të zëshëm protestojnë për naftën, por më e rënda është kriza e energjisë që po konsiderohet si pandemia e re. Kjo qeveri e ka deklaruar qysh në krye të herës se jemi përballë në krize. Tani jemi në zemrën e krizës dhe që ne do i vendosim mburojë mbrojtëse familjarëve dhe bizneseve të vogla, për të mos lejuar që rritja çmendurake e çmimeve të bie mbi ta. Sot nëse çmimi i energjisë do të jetë ky që është sot, pra nga 52 euro për megavat orë, 550 euro për megavat orë nga ku ne jemi të detyruar të importojmë, do të na duhen 640 mld ekstra deri në fund të vitit. Këtë po bën kjo qeveri. Është për të qeshur e qarë kur kjo merret si diçka që është e mirëqenë, e shumëkush thotë na trego energjinë, por shiko naftën. E tregoj energjinë sepse nëse ne do të rrisnim çmimin e energjisë, do të preknim pjesën më vulnerabël të shoqërisë që nuk kanë makina. Do të preknim fermerët, pensionistët, do të preknim familjet në ndihmë ekonomike. Do të preknim qindra e mijëra njerëz dhe do të preknim motorin e vetëpunësimit, biznesin e vogël. Ne këto nuk i prekim. Nëse çmimi i energjisë do të kthehet para luftës, aty ku ishte, do të na duhen mbi 250 mln ekstra.
Nuk shikohet kjo pamje duke u fokusuar te taksat e naftës. Është e vërtetë që kemi te struktura e çmimit të naftës një ngarkesë ekstra që të tjerët nuk e kanë, ndaj është çmimi më i lartë. Por të tjerët nuk e kanë zero TVSH për biznesin e vogël, nuk i kanë kaq të ulta saç i kemi ne taksat për pagat. Të tjerët nuk i kanë kontributet shoqërore dhe shëndetësore si ne, më të ultat në rajon. Të tjerët kanë të ardhura nga ngarkesa fiskale më e madhe mbi individin dhe biznesin e vogël. Të tjerët nuk paguajnë 45 mln dollarë në vit, për të kompesuar faturën e energjisë të familjeve në nevojë, siç paguajmë ne. Shifër që sot është shumë më e lartë se kaq për shkak të krizës. Është e rëndësishme që të gjithë të jenë të vetëdijshëm se këtu, si në të gjithë fillin e arsyetimit tonë qeverisës, kush ka më shumë mundësi do të mbajë më shumë barrë, e kush ka një makinë do të mbajë më shumë barrë se ai që nuk ka asnjë veturë. Ata që dalin me x5 dhe bllokojnë rrugën se kanë pagën 300 mijë lekë. Do të shohim se si të kompensojmë fermerët. Është rritur çmimi? Po, kemi vendosur që fermerëve t’u japim naftë pa taksa”, u shpreh Rama.