Prokuroria ka nisur hetimet pas skandalit në Kadastrën e Durrësit. Kjo lëvizje e Prokurorisë pason pas thirrjes së amerikanëve, ku kërkuan që zyrtarët e korruptuar të Kadastrës së Durrësit të dalin para drejtësisë. Kreu i Kadastrës, Artan Lame denoncoi ditë më parë se nga të gjitha dosjet e marra nga Kadastra e Durrësit, vetëm 15 % e tyre janë pa probleme. Pjesa tjetër e regjistrave kanë rezultuar me faqe që mungojnë, të grisura madje edhe shumë të dubluara që tregojnë se për një pasuri janë ndjekur dy rrugë të ndryshme legalizimi apo kthimi te pronari duke sjellë abuzime shumë të mëdha.
Në një njoftim thuhet se Prokuroria pranë Gjykatës së Shkallës së parë Durrës ka regjistruar procedimin penal. Në njoftim citohet se me urdhër të drejtueses së prokurorisë është krijuar një grup hetimor i përbërë nga prokurorë dhe oficerë të policisë gjyqësore për hetimin e plotë të kësaj çështje. “Nisur nga faktet e bëra publike në media për kontrollin e ushtruar në Kadastrën e Durrësit dhe konstatimin e dëmtimeve në regjistrat e pasurive të paluajtshme të regjistruara në zonën bregdetare të Durrësit si Plazh, Spitallë, Lalëz, Draç, Rodon, etj Prokuroria pranë Gjykatës së Shkallës së parë Durrës ka regjistruar procedimin penal nr. 582, datë 01.04.2022 për veprat penale të parashikuara nga nenet 186 e 248 te Kodit Penal. Me urdhër të drejtueses së prokurorisë është krijuar një grup hetimor i përbërë nga prokurorë dhe oficerë të policisë gjyqësore për hetimin e plotë të çështjes”, thuhet në njoftimin e Prokurorisë.
Thirrja e amerikanëve
Për skandalin e Kadastrës së Durrësit reagoi dy ditë më parë ambasadorja e Shteteve të Bashkuara të Amerikës Yuri Kim. Ajo u shpreh se është në pritje të drejtësisë që të marrë masat e duhura për përgjegjësit e Kadastrës së Durrësit.
Teksa këtë raport e cilëson shumë të sinqertë që nxori në pah jo vetëm mangësitë, por edhe krime të mundshme, Kim thotë se duhet bërë më shumë transparencë lidhur me pronat në Shqipëri.
“Mirëpresim raportin e sinqertë të Agjencisë së Kadastrës në lidhje me mangësitë dhe krimet e mundshme në Durrës. Ne presim hapa konkretë për përgjegjësit, për të rritur transparencën dhe për të mbyllur mundësitë për korrupsion kur bëhet fjalë për regjistrimin e pronave në Durrës dhe në Shqipëri. Hapat e tillë do të tërheqin më shumë investime, përfshirë edhe nga SHBA-ja. Ata gjithashtu do të bëjnë të qartë se Shqipëria është gati për t’u anëtarësuar në BE”, shkruan Kim.
