Pas komentit qesharak ndaj nënës së 15-vjeçarit të dhunuar, ku përdori edhe një video personale për të fshehur gjurmët, një tjetër reagim ka ardhur nga Ardi Veliu.
Ai sqaron se kjo ngjarje nuk po raportohet siç është realisht, dhe për këtë shpreh keqardhje. Pas denoncimeve ndaj kreut të Policisë, Veliu thotë se fjala e tij nuk mund të nxirret nga konteksti.
Duke justifikuar aktin e rëndë, kryer ndaj një familje, Ardi Veliu thotë se këtë detyrë do ta mbaj deri në fund me nder. Në të njëjtën kohë kërkon ndjesë që ka krijuar, atë që ai e cilëson keqkuptim me komentin e tij.
Ndonëse është me zë e figurë, duke treguar foton e nënës së fëmijës, Ardi Veliu thotë se fjala e tij është nxjerrë nga konteksti.
Kreu i Policisë së Shtetit, Ardi Veliu, reagoi pas zemërimit që ka shpërthyer në opinionin publik me qëndrimet që mbajti sot, kur justifikoi dhunën policore ndaj një të mituri. Ai tregoi një video të nënës së 15-vjeçarit të dhunuar, e cila mbante një pistoletë në dorë. Situata mori një tjetër rrjedhë, pasi Veliu nuk e dinte që e ëma e të dhunuarit është aktore, dhe videoja që ai përdori, ishte një sekuencë gjatë xhirimeve të një filmi.
Deklaratë e Drejtorit të Përgjithshëm të Policisë së Shtetit, Ardi Veliu:
Jam i keqardhur që Policia e Shtetit bëhet rregullisht shënjestra e atyre që kurrë nuk e thanë një fjalë motivuese për të dhe sot përsëri e njëjta gjë.
Ndërkohë që ne jemi organizata më rigoroze në goditjen e fenomeneve brenda vetes, mjafton që një punonjës i yni të bëjë një gabim dhe megjithëse ndëshkohet në radhë të parë prej nesh, prapëseprapë goditja vijon ndaj Policisë së Shtetit.
Sot unë jam vënë personalisht në shënjestër dhe më vjen keq për deformimin që po i bëhet realitetit të ngjarjes për të cilën fola dhe vetë qasjes sime ndaj saj.
Së pari, fjala ime nuk mund të nxirret nga konteksti, siç po bëhet.
Së dyti, kam bërë një ilustrim të idesë se nuk mundet të fajësohet gjithnjë vetëm punonjësi i Policisë duke u kapur pas një fotoje të rastit, pa konsideruar tërë kontekstin e një situate.
Së treti, kam sqaruar se punonjësi në fjalë është pezulluar dhe ka nisur hetimi disiplinor dhe penal për të.
Së katërti, unë po komunikoja hapur me deputetët, një shqetësim që është i mbarë punonjësve tanë, për demonizimin që i bëhet figurës së Policit të Shtetit dhe nuk doja të thosha më shumë se kaq.
Por në fund dëshiroj t’u them të gjithë atyre që po e gjykojnë me ngut këtë “krim” të radhës, se nëse nuk kam arritur dot ta sqaroj si duhet atë ç’ka kisha qëllim, kjo nuk mjafton për të më gjykuar me qëllim.
Këtë detyrë e kam mbajtur dhe do ta mbaj deri në fund me nder dhe puna ka folur e do të flasë për mua dhe Policinë e Shtetit më mirë se sa fjalët tona.
Ndjesë nëse kam krijuar një keqkuptim me komentin tim dhe besoj se kushdo që do të gjykojë pa paramendim dhe pa e menduar edhe këtë si rastin e radhës për të baltosur Policinë e Shtetit, do të gjejë arsye për ta pranuar ndjesën time!
