Ish-deputeti i PD, Agron Shehaj, ka denoncuar një aferë korruptive. Sipas tij, qeveria i ka shtuar koncesionit të laboratorëve, 4 miliardë lekë në buxhetin e ardhshëm.
Duke e demostruar me anë të një dokumenti, ai shkruan që në krye të herës se skandalet korruptive të Rilindjes nuk kanë fund.
“Vlera e koncesionit sipas draftit të buxhetit, kalon nga 9 miliardë lekë që ishte, në 13 miliardë lekë. Pra 4 miliardë lekë (gati 35 milionë euro) më shumë, pa dhënë asnjë shpjegim dhe në shkelje të ligjit”, shkruan Shehaj në Facebook.
Statusi
Skandalet korruptive të Rilindjes nuk kanë të sosur. Ky është dokumenti zyrtar që tregon se në mënyrë të beftë, qeveria ka rritur faturën e koncesionit të laboratorëve me mbi 35 milionë euro pas tenderit.
Draftbuxheti i vitit 2020 zbulon se qeveria do të paguajë 12,8 miliardë lekë për koncesionin e laboratorëve. Oferta e deklaruar fituese në tender nga qeveria, ishte 9 miliardë lekë.
Skandali është akoma më i madh nëse konsiderojmë që ministria e Shëndetësisë ka deklaruar zyrtarisht që vlera e Koncesionit të laboratorëve ishte 9 miliardë (66 mln euro). Kjo vlerë është aprovuar edhe në ligjin e Buxhetin e Shtetit për 2018 dhe 2019.
Por pa asnjë shpjegim dhe në mënyrë krejtësisht jo transparente, vlera e Koncesionit sipas draftit të buxhetit, kalon nga 9 miliardë lekë që ishte, në 13 miliardë lekë, pra 4 miliardë lekë (gati 35 milionë euro) më shumë, pa dhënë asnjë shpjegim dhe në shkelje të ligjit.
Koncesioni i laboratorëve është një aferë korruptive, jo vetëm për rritjen e vlerës prej dhjetëra miliona euro, por edhe për faktin që kompania që ka fituar tenderin, është e llojit Guackë dhe për të cilën është e pamundur të dihet kush janë pronarët.
Lejimi i pjesëmarrjes së kompanive Guackë në tenderat publike, është tregues i qartë i vjedhjes së parave publike nga qeveria shqiptare.
