Deputeti Myslim Murrizi ka komentuar fotot e publikuara një ditë më parë ku presidenti Ilir Meta shihej në të njëjtën tavolinë me Xhevdet Troplinin dhe Altin Hajrin. Murrizi tha në Kuvend se nuk kishte ndërmend ta votonte aktin normativ të ‘Anti-KÇK’-së, pasi qeveria nuk ka nevojë për votat e opozitës.
Duke risjellë në fokus situatën kriminale në vend, ai tha se para dy ditësh u vranë dy persona në Durrës. Me tone të larta ai u shpreh se nuk ka aspak konsideratë për të ‘fortët e krimit’, që i quajti kokë palarë.
“Çfarë bën kjo OFL-ja zoti ministër? Vetëm para dy ditësh u vranë dy persona në Durrës, në Rëshen u ekzekutua me snajper…dhe mos kujtoni se kam konsideratë për ata kokë palarët që dalin në foto me ju.
Se i nxirrni, pasi prisheni. Jo më larg se dje, gazeta që paguhet nga ju, apo mban krahun tuaj, gjatë gjithë kohës nxorri fotot e atij që u zgjodh këtu me duartrokitjet tuaja, kur unë isha në çadër në protestë. Dhe sot e keni shpallur armik si Mehmet Shehun që thatë se vrau veten. Dhe nuk kam ndërmend ta votoj këtë akt, po ju s’keni nevojë për votat e opozitës”, tha Murrizi.
