Ministrja e Shtetit për Rininë dhe Fëmijët, Bora Muzhaqi, duket se ka gjetur kohë për të folur lidhur me krimin makabër, ku një 8-vjeçar u vra barbarisht nga fqinji i tij.
Kjo ngjarje shokoi mbarë opinionin publik, por një ditë pas krimit ministrja tha se nuk kishte kohë të fliste për atë që kishte ndodhur.
Ndonëse drejton një institucion që u krijua me futjen e Muzhaqit në kabinetin qeveritar, në mënyrë që fëmijët të kishin një vëmendje më të madhe, ministrja tha se në fakt ajo nuk ka asnjë lloj përgjegjësie mbi këto ngjarje.
Pavarësisht insistimit të gazetarëve, Muzhaqi u largua me një buzëqeshje, teksa thoshte se ishte shumë vonë e duhej të largohej. Tetë ditë pas vrasjes së vogëlushit Mateo Vasiu, ministrja e Ramës gjeti kohë të thotë dy fjalë nga Korça.
“Pjesa e fëmijëve është shumë e rëndësishme për mua. E para, ndjesë se të rreh zemra kur flet për ngjarje të rënda. Duhet t’i shpreh ngushëllimet e mia familjes, dhe e kuptoj se kjo është pjesa më e rëndësishme që ne të gjithë duhet ta themi për momentin. Përsa i përket politikave apo gjërave që duhet të bëjmë për këtë fushë, është ndoshta jo momenti i duhur për të folur. Kjo s’do të thotë se s’po merremi apo angazhohemi aktivisht, do kohën e vetë për të arritur në konsensus dhe uroj që ngjarje të tilla mos ndodhin në Shqipëri”, u shpreh ajo.
